ហួងហែងព្រោះស្រឡាញ់ (បទពាក្យប្រាំពីរ)

ឱ!កែវព្រលឹងកុំខឹងបង………………………រឿងដែលឆ្គាំឆ្គងទាំងប៉ុន្មាន

ព្រោះតែបងស្នេហ៍ស្រស់កល្យាណ………….រំអុករំខានគ្រប់វេលា។

មិនដឹងហេតុអ្វីចិត្តចាប់ឈឺ………………….បានឮអូនលេងស័ព្ទវាចា

មិនថាប្រុសនោះជានរណា………………….បងសែនឆ្លេឆ្លាពេញដួងចិត្ត។

បងចង់ស្ទុះស្ទាទៅកាត់ស្ទាក់……………….ប្រាប់គេឱ្យជាក់ហាមកៀកកិត

កុំមកផ្តោះផ្តងរឿងស្នេហ៍ស្និទ្ធ………………កុំគិតលួងលោមសុំក្តីស្នេហ៍។

ពេលខ្លះរៀមងរឥតដឹងខ្លួន…………………ឃើញស្ងួនមិនស្តីដាក់បងដែរ

ខ្លាចអីស្រីធុញហើយប្រួលប្រែ……………..នោះទុក្ខឥតល្ហែឥតស្រាកស្រាន្ត។

រៀមទូរស័ព្ទមិនទំនេរ……………………….ជួនតេមិនចូលកើតរំខាន

នឹកតូចចិត្តខ្លាំងខ្លាចផុមផាន………………អូនបានរវល់នឹងអ្នកផ្សេង។

រៀមចង់នៅជិតគ្រប់វេលា………………….ឃ្លាំថែការពារគ្រប់កន្លែង

អូនចង់ទៅណាបងស្វះស្វែង………………ខ្លាចពួកអាដែងវាចោមញ៉ែ។

សង្សារសម្លាញ់សម្លាប់ចិត្ត…………………បងស្នេហ៍ពេកពិតឥតប្រួលប្រែ

សូមអង្វរចុះណាមាសស្នេហ៍………………ពាក្យបែកពាក្យបែរមិនចង់ឮ។

រាល់ថ្ងៃហួងហែងអូនខ្លាំងណាស់………….ចង់តែប្រកាសឱ្យរន្ទឺ

ចង់មានបងម្នាក់ពេលអូនឈឺ…………….ថែថួនជម្ងឺអូនផ្ទាល់ដៃ។