ទំនួញក្ដារចុច

ស្នេហ៍អូនប៉ុណ្ណាជីវាមិនដឹង	អូនដាច់ចិត្តខឹងទាំងបងនៅស្នេហ៍
ប្រាប់កុំព្យូទ័រជាមិត្តនិត្យក្បែរ	រឿងស្រីប្រួលប្រែព្រោះតែខ្ញុំក្រ ។
ទំនួញក្ដារចុចអុជចិត្តឲ្យឆួល	ស្រីគិតបែបស្រួលធ្វើចិត្តដូចថ្ម
ក្ដារចុចក្ដារចាំចាររឿងបន្ត	ចុងក្រោយគេក៏ខណ្ឌចប់ឥតន័យ ៕
	អ្នកនិពន្ធ៖ កើយ ចិត្រា

ទុក្ខស្ដៅស្វាយខ្វិត

ចន្ទីចេញផ្កា	ចង់បានសង្សារ	បណ្ដើរអួតម៉ែ
កង្កែបបើករន្ធ	ភិរុណស្រោចស្រែ	អាធ្រាត្រដួងខែ
	រះមួយភាគបី ។
លួចនឹកកល្យាណ	នៅក្បែរជើងក្រាន	ច្រៀងបទភក្ដី
ភ័ក្ត្រអើយភ័ក្ត្រអូន	រលោងហ្មត់ខ្ចី	លួចស្រឡាញ់ស្រី
	ដល់ផ្លែព្រីងទុំ ។
តុកែធំណាស់	វាយំច្បាស់ៗ	រាប់ប៉ះក្រមុំ
ខ្សឹបៗប្រាប់ម៉ែ	លក់ស្រែមួយដុំ	យ៉ាងយូរបុណ្យភ្ជុំ
	សុំម៉ែស៊ើបសួរ ។
អំពិលលាស់ត្រួយ	បេះដូងរែងព្រួយ	ទឹកភ្នែកហែកហួរ
ទុក្ខស្ដៅស្វាយខ្វិត	រែងគិតម៉ៅមួរ	គួរឬមិនគួរ
	ចង់ការថ្ងៃស្អែក ។
ផ្កាអើយផ្កាថ្ងាន់	ខ្លាចស្រីប្រកាន់	ប្រកែប្រកែក
ទ្រូងនឹងធ្លាយធ្លុះ	រោយរុះស្រាំបែក	ជីវិតរហែក
	ខ្ទេចខ្ទីមិនខាន ៕
		អ្នកនិពន្ធ៖ កើយ ចិត្រា

បាត់មេឆ្មា

ថាឆ្ងល់អើយឆ្ងល់	ទ្រព្យទុកមិនសល់	ខ្វល់ចិត្តមើលថែ
មិនបានប្រយ័ត្ន	បាត់មាន់បាត់ឆ្កែ	ឈឺចិត្តឥតល្ហែ
	ឥតស្បើយម្ដងណា ។
នឹកមិនអស់ចិត្ត	ដើររកដល់ល្ងឹត	ឥតឃើញមេឆ្មា
ចោលកូនកំព្រា	រងាម្ល៉េះណា	មិនដឹងអាណា
	លួចឆ្មាអញបាត់ ។
សង្ស័យអាចែម	ទាក់ធ្វើគ្រឿងក្លែម	ផឹកស៊ីស្ងាត់ៗ
អ៊‍ីចឹងទបើវា	មិនហៅមួយម៉ាត់	អញខឹងពេកក្ដាត់
	អាអន្តរាយ ។
ដល់ផ្ទះម៉ែក្មេក	ដល់ម៉ោងហេវពេក	លបចូលផ្ទះបាយ
ក្រឡេកឃើញឪ	នៅក្បែរគល់ស្វាយ	កំពុងតែកាយ
	ដីកប់រោមឆ្មា ៕
		អ្នកនិពន្ធ៖ កើយ ចិត្រា

សែនស្ដាយ

សែនស្ដាយអនេក	សម័យលឿនប្លែក	ខ្មែរខ្លះវីវក់
នារីសម័យ	ឃើញមាសជាភក់	ខំក្រេបជញ្ជក់
	វប្បធម៌ថ្មី ។
ស្ដាយកេរ្ដិ៍ដូនតា	ផាមួងប៉ាក់ផ្កា	ក្រមាសូត្រស្រី
ស្រាតបង់អសារ	ស្រវាខើចខ្លី	មិនចំសាសន៍អី
	ត្រឡុងតុងឆាំង ។
សែនស្ដាយក្មេងៗ	កំពុងវង្វេង	ល្បែងស្រាបោកឆ្នាំង
ច្រងេងច្រងាង	កាចកាងបែបខ្លាំង	ផឹកស្រាបារាំង
	ស្រវាំងឡាំប៉ា ។
សែនស្ដាយសៀវភៅ	ជាយានឆ្ពោះទៅ	មរតកថ្លៃថ្លា
កូនភ្លើនបំភ្លេច	ប៊ិចស្លាបប៉ាកកា	គុណធម៌មេបា
	លង់ហៅលែងឮ ៕
		អ្នកនិពន្ធ៖ កើយ ចិត្រា

ចំណងស្នេហ៍ Smart

ជាងប្រាំឆ្នាំហើយ	បងនិងត្រាណត្រើយ	យើងរាប់អានគ្នា
យើងធ្លាប់សាសង	ឆ្លងកាលវេលា	រហូតក្លាយជា
	មានចិត្តស្នេហា ។
បងសំឡឹងមេឃ	ស្រឡាញ់អូនពេក	ភ្នកអនុស្សារ
នឹកដល់ពាក្យអូន	ស្ងួនធ្លាប់វាចា	ចាំជាប់ចិន្ដា
	«នឹកតែបងមួយ» ។
យូរៗជួបម្ដង	ស្រីអូនបែរខ្នង	ឲ្យបងរែងព្រួយ
អៀនបងឬអ្វី	ស្នេហ៍ពន្លកត្រួយ	អាណិតអូនជួយ
	បែរភ័ក្ត្ររកបង ។
វណ្ណៈមិនស្អាត	ក្រីក្រខ្វះខាត	អភ័ព្វកន្លង
អរគុណSmartណាស់	Freeជូនរាល់ដង	រឹតភ្ជាប់ចំណង
	ស្នេហ៍បងនិងអូន ៕
		អ្នកនិពន្ធ៖ កើយ ចិត្រា

សង្គ្រាមប្រាក់បាតខាតបង់បេះដូង

បឹងខ្សាច់អូរញរទឹកហូរដាច់ផ្លូវ	ស្រណោះស្រែស្រូវបាត់ម្ចាស់រក្សា
បន្លែរោងថ្មីដីបែកមាត់ហា	បឹងកក់មេច្បារចម្ការឥតផល ។
ថ្ងៃលិចចុងភូមិក្រហមដុតមេឃ	ខ្ញុំហូរទឹកភ្នែកជ្រែកលើទ្រូងថ្នល់
ដើមត្នោតដួលដេកផ្អែកជាបន្ទាល់	ចិត្តខ្ញុំសែនខ្វល់ដល់ស្នេហ៍ព្រាត់ឆ្ងាយ ។
សង្គ្រាមប្រាក់បាតខាតបង់បេះដូង	ភូមិយើងលិចត្បូងស្ងាត់មាត់មេម៉ាយ
អាសូរកំលោះអស់ចិត្តសប្បាយ	ក្រឡែកជិតឆ្ងាយស្ដាយអស់ក្រមុំ ។
ផ្គរលាន់គគ្រឹកនឹកអនុស្សារ	មេឃគ្មានមេត្តាប្រហារស្នេហ៍ខ្ញុំ
ចិត្តលោភនាំគ្រោះនរកឃាំងឃុំ	តណ្ហាឥតព្រំថ្ងៃណាសាបសូន្យ​​ ៕
	អ្នកនិពន្ធ៖ កើយ ចិត្រា

ខ្មែរអើយកុំភ្លេចខ្លួន

ខ្មែរអើយកុំភ្លេចខ្លួន	កុំភ្លេចយួនពួនប្រហារ
ល្បិចវាបីដូចឆ្មា	កុំសន្យាចារព្រមព្រៀង ។
បាតដៃជាខ្នងដៃ	ពូជព្រៃផ្សៃក្បត់បត់ឃ្វៀង
ក្រឡាស់ផ្លាស់មិនទៀង	ខ្មែរជាប់ងៀងពួកតែអុង។
មកដល់ព្រៃនគរ	យួនភូតភរខ្មែរធ្លាក់ផុង
ជីម៉ិញបែរកាណុង	យួនយៀកកុងជាក្រពើ។
	អ្នកនិពន្ធ៖ កើយ ចិត្រា